يعني ايه تسويق!
يعني ايه تسويق!
مبروك بعد طول انتظار حلمك قرب يبقى حقيقة وحتبدأ اول مشروع ليك
كونجراتولايشنز
اخترت المجال اللي حتشتغل فيه وعرفت خبايا الصناعة وكل الامور المحيطة هوب تلاقي حد بيقولك والتسويق؟
فانت تجاوب بمنتهى الثقة عادي حشوف شاب من بتوع اليومين دول يعملي اعلان ممول اعلان حلو كده ب 500 ج يلف مصر كلها والممول لو شغال كويس حنكمل معاه
لو بتفكر في التسويق بالشكل ده فأحب اقولك انك في خطر داهم بص يا سيدي الاعلان الممول هو الخطوة الرابعة في التسويق مش الاولى ولا التانية ولا حتى التالتة
امال التسويق ايه؟
التسويق يا عزيزي رجل الاعمال "إن شاء الله" مكون من 4 خطوات
الخطوة الاولى
وهى المنتج او الخدمة اللي حتسوق ليهم ومين حيشتريهم ومين المنافسين لمنتجك في السوق
الخطوة الثانية
وهى التسعير سعرك عامل ايه قليل ولا عالي طيب عندك عروض طيب العروض دي مناسبة طيب السعر مقابل القيمة مناسب ولا عندك مشكلة
الخطوة الثالثة
المكان انت حتبيع من خلال محل وموقع المحل مناسب لزبونك ولا لا طيب حتبيع اون لاين زبونك على الفيس ولا الانستا ولا قاعد على التيكتوك ولا يحب يشتري من خلال موقع
رابع خطوة والاخيرة
وهى الاعلان اللي حضرتك عاوز تعمله ب 500 ج والاعلان سيدي رجل الاعمال هو اللي بيعكس الثلاث خطوات الاولى ولو نطيت هوب مرة واحدة للاسف مش حتحقق هدفك من الاعلان
اتعقدت مش كده !
اهدى يا راجل احنا لسه بنقول يا هادي مش عاوزك تخاف التسويق هو دراعك اليمين وهو الوحيد اللي حيساعدك تلاقي المشكلة وتحلها بمعنى لو حضرتك عامل تسويق صح وعملت اعلان ومجابش النتيجة المرجوة حتقدر تراجع خطواتك وتعرف المشكلة فين وتحلها مشكلة في السعر (غالي او رخيص) مشكلة في الجمهور مشكلة في المكان وتحلل النتائج وتحل وتطور من نفسك لكن لو مش عامل تسويق والاعلان محققش نتيجته حتمسك في خناق الميديا باير الغلبان وتغيره وتجيب غيره وغيره وانت مش عارف اصلا المشكلة فين بس يا سيدي ولينا لقاء اخر حنتعلم فيه سوا ازاي نختار شركة التسويق اللي تشتغل معاها
